Co wopśimjejo prozninske wudaśe Płomjenja?
Mimo k lěśojskemu casoju pasujucych zwucowanjow a gódańkow mamy w Płomjenju na pśikład luštnu baseń „Tej na kšywje“ wót awtorki Jill-Francis Ketlicojc. Wjelgin rědne jo teke wulicowanje „Mehrur a jeje tiger“. W teksće cytaśo wó pśijaśelstwje źowća a tigera. Młodej awtorce wulicowanja pśiźotej z Afghanistana a stej za Płomje prědny raz pisałej.
Wušej togo cytaśo w nejnowšem Płomjenju mjazy drugim slědny źěl serije „Mója dobrowólna słužba w Luxemburgskej“. Awtorka Lara Pundrichojc zespominajo jadno lěto we wukraju, pišo wó swójom źěle ze zbrašnymi źiśimi a pśedstajijo nam teke dalšnych dobrowólnikow, kótarychž jo w Luxemburgskej zeznała.
Graju w tom wudaśu teke dowol a prozniny jadnu rolu?
Na kuždy pad! Tema memory w casopisu jo mórjo a tema našych wokablowych kórtkow su lěśojske prozniny.