Z Pódstupima/Potsdam. Pśisamem pśed 30 lětami, 17. julija 1994, jo wobzamknuł Krajny sejm Bramborska Serbsku kazń. Kazń jo wuznamny mrocnik za pśipóznaśe a šćit serbskego luda. Zawěsćujo zachowanje a spěchowanje rěcy, kultury a identity Serbow a zarucujo financielnu pódpěru za kulturne institucije a kubłańske projekty. „Tśiźasćalětny jubilej Serbskeje kazni jo góźba, wuspěchy zajźonych tśich lětźasetkow wuzwignuś a do pśichoda glědaś, aby se kulturna wjelerakosć Bramborskeje nadalej spěchowała. Dopomina na to, kak wažne jo, pšawa mjeńšynow šćitaś a kulturne derbstwo zachowaś“, tak zastupujucy pśedsedaŕ Domowiny dr. Hartmut Leipner. Jaden wobstatk kazni jo póraźujuca Serbska rada, kótaraž zajmy Serbow zastupujo pśi krajnem sejmje Bramborska a grajo rozsudnu rolu pśi zwopšawdnjenju a dalejwuwiśu pšawow Serbow.