Z Praga/Prag. Wót 28. do 29. junija jo se wótměła na Katolskej fakulśe praskeje Karloweje Uniwersity konferenca „Bibliska rěc pódwjacornych Słowjanow“. Eksperty a slěźarje z Českeje, Pólskeje, Słowakskeje a Dolneje Łužyce su diskutěrowali wuznam a wliw Biblije na rěc pódwjacornych Słowjanow. Konferenca jo zmóžniła wuměnu dopóznaśow a slěźeńskich wuslědkow wó pśełožkach a interpretaciji Bibliji. Referaty, kenž su se źaržali w pólskej, českej, słowakskej a dolnoserbskej rěcy mimo dolmetšowanja, su wobswětlili historiske wuwiśe wšakich słowjańskich Biblijow a jich wustatkowanje na rěc, literaturu a kulturu pótrjefjonych regionow. Eksperty su wuzwignuli rolu bibliskeje rěcy glědajucy na kulturnu identitu a duchnu wuměnu we słowjańskich zgromaźeństwach. Wobźělniki konference su wuzwignuli relewancu pśedstajonych temow ako za teologiju a stawiznisku wědomnosć tak teke za słowjańsku rěcywědu a literarnu wědomnosć. Referaty konference, kótaraž jo se wugótowała k sedymemu razoju, se wózjawiju w casopisu za kulturnohistoriske studije Clavibus unitis.