W kaderje Serbskego mustwa jo 21 kopaŕkow, kótarež dojědu lětosa na drugu Europeadu pó lěśe 2016 do Flensburga. Z Dolneje Łužyce graju Laura Hanušojc z Hochoze, Paula Simulic z Barbuka a Linda Rudolfojc z Depska wót Viktoria Chóśebuz/Hochoza za Serbske mustwo, a mimo togo Johanna Lierschojc z Bórkow a Ulrika Lobeźina z Hochoze wót KSV Sperenberg. Ze srjejźneje Łužyce, rozmjej ze Slěpego, su Amy-Helen Kiszec, Thea Kuntzec a Vanessa Peschelec pódla, kótarež graju za SV Lok Slepo. Druge grajaŕki su z Górneje Łužyce, ale jadna abo druga jo južo zwenka Łužyce nazgónjenja zběrała. Lavinia Frencelec grajo w Barlinju za Hertha BSC U 17-mustwo a Johanna Wjeselic w Pódstupimje za 1. FFC turbina Pódstupim. W portrejach zgónijośo wjele wěcej wó našych grajaŕkach. Tłocmy jim palce! Toś te mjeńšyny wobźěliju se na lětosnej Europeaźe

Z 12 europskich krajow se wobźěliju narodne a rěcne mjeńšyny na lětosnej Europeaźe. Z Rumuńskeje a Italskeje ga naraz pěś. Mimo Serbow jo 23 mjeńšynow swójich koparjow na turněr pósłali – źewjeś wót nich teke kopaŕki.