Z Gubina. Tśirěcne knigły „Ze źiśimi se módliś“ wót profesorki Barbary Städtler-Mach jo kóńc zajźonego lěta wudało Spěchowánske towaristwo za serbsku rěc w cerkwi z.t.. Źěkowano dolnoserbsko-nimsko-pólskej tśirěcnosći teje publikacije jo wóna wubuźiła zajm w dwěma krajoma: w Dolnej Łužycy w Nimskej a w Pólskej w ewangelskich wósadach blisko nimsko-pólskeje granice. Swětkowna wósada w Gubinje jo měła taki zajm, až bu na swětkownej pónjeźeli w Gubinje organizěrowane wósebne zmakanje z awtorku. Gósćinaŕ jo był faraŕ Bogdan Toma-szewski, kótaryž nawjedujo gubinsku Swětkownu wósadu. Na zmakanju su se wobźělili zastupnice gubinskich familijow, kótarež maju małe źiśi abo źiśiźiśi. W ekumeniskej a spódobnej atmosferje su zgromaźone dwě góźinje z awtorku prof. Städtler-Mach do rozgrona pśišli. Jo šło wó nastaśe tekstow a knigłow, ale teke wó rozdźěle mjazy ewangelskeju, Swětkowneju a katolskeju cerkwju. Njejo na stawiznach ze starych casow felowało, kótarež jo wulicował 88-lětny Jan Tomaszewski, nan fararja Bogdana Tomaszewskego a załožaŕ Swětkoweje cerkwje w Gubinje.