Z Města/Cottbus. Slědny tyźeń jo Nowy Casnik informěrował wó tom, co jo Załožbowa rada Załožby za serbski lud nastupajucy pśichod Ludowego nakładnistwa Domowina tematizěrowała a wobzamknuła. Teke ze wšakimi drugimi temami su se cłonki Załožboweje rady na wónem pósejźenju 23. maja w klubowni Dolnoserbskego internata zaběrali. Tak jo direktor Załožby za serbski lud Jan Budar cłonkow gremiuma informěrował wó aktualnem stawje planowanjow „Serbskego foruma wědy na Lawskem arealu“ w Budyšynje. Glědajucy na opciju Budyšyńskeje bydleńskeje towarišnosći, kenž wótběžyjo kóńc junija togo lěta, jo rada pśizwóliła nakup styri gruntow za 520.000 euro. Z tym su wšykne za twaŕ trjebne grunty zawěsćone. W drugej połojcy lěta 2025 co Załožba zachopiś tam twariś nowy domicil pśedewšym za Serbski muzej a Serbski institut – dotwarjony dejał byś až do lěta 2029. Za cełkowny projekt wuchadaju z kostami we wusokosći 44,5 milionow euro (pjenjeze Załožby njesměju se za to wužywaś, jano spěchowańske srědki).