Z Města/Cottbus. Slědny tyźeń wałtoru jo se prědny raz wugótował wjeleseraki wuwitański event w chóśebuskem nutśikownem měsće. Iniciěrował jo ten swěźeń Jens Taschenberger, pśedewześaŕ a cłonk góspodaŕskeje pśirady wušego šołty Chóśebuza. Tak jo se pód patronatstwom Tobiasa Schicka wjele chóśebuskich akterow pśiswójło to moto: Gromaduźaržanje. We tom ramiku jo se swěśiła demokratija na pyšnych stacijach na naměstnje pśi Měsćańskej studni, stej se wugótowałej wjeliki blidowy balokopaŕski turněr na Starych wikach a multikulti-kjarcmaŕska noc w něźi 12 městnosćach wót Ebertowych dwórach až do Měsćańskeje promenady.

„Klěb a sol“ jo pśepšosył mjazynarodnych studěrujucych, wuknjeńcow a fachnikow do chóśebuskego centruma, ale teke wšych Chóśebuzarjow a Chóśebuzaŕki a aktery lokalnego góspodaŕstwa – tak jo cełe město sajźiło znamje za nowu wuwitańsku kulturu. Njeglědajucy na dešćowe wjedro jo to něźi 2.500 woglědarjow pśiwabiło, něźi tśeśi źěl su byli studenty BTU kaž teke wuknjeńce. Za pśiduce lěto se južo planujo pśiducy swěźeń „Klěb a sol“.