Z Redakcije/Redaktion. Pó tradiciji wót 1994 se wótmějo drugi swětkowny źeń ten Nimski źeń młynow. We tom lěśe zas wótwórijo něźi 650 historiskich młynow pó cełej Nimskej ku tej góźbje swóje źurja. „Deutsche Gesellschaft für Mühlenkunde und Mühlenerhaltung (DGM) e.V.“ a jeje krajne a regionalne zwězki pśepšosyju na źeń młynow, ga k 30. razoju. Lěc wětšniki, wódne młyny, pśez spaŕ abo motor gónjone młyny – za wšyknych zajmcow buźo něco pódla. Wobgóspodowarje młynow daju swóje drogostki mlaś a póbituju dłymše doglědy do kulturnego derbstwa młynow a do starego młynikojstwa. Teke někotare młyny našogo regiona su zaplanowali wšake póbitowanja ku dnju młynow.

Lěšćański młyn (Hornower Mühle) se namakajo na Grodkojskej šoseji 2 w Grodku. Wót zeger 10:00 do 15:00 planuju how wjeźenja pó młynje a kulturelne wobrubjenje z guslowarjom Mister Kerosin, z Juttu von Kittlitz a z Pumpotom. Pótom grajo Lěšćański pozawnowy chor a pśez ceły źeń budu wabiś markowe stojnice.