Ze Žylowa/Sielow. Njewócakane jo skóro 60 luźi do žylojskego gósćeńca na športnišću SG Žylow pśichwatało, aby se woglědało dolnoserbski źiwadłowy kus „Smjerś pó štuckach“ Nimsko-Serbskego ludowego źiwadła Budyšyn. Pśi wótwórjenju jo dramaturgowka Madleńka Šołćic widobnje pśechwatana ale rownocasnje wjasoła publikum wuwitała a zwěsćiła: „Smy prědny raz w Žylowje a tak wjele luźi jo pśišło. Smy se prědk wzeli wejsnu rěc na jawišćo pśinjasć...“, a to jo se grajaŕskemu ansambloju derje raźiło. Błośański krimi bazěrujo na wulicowańku Marcusa Kóńcarja, kenž stej Madleńka Šołćic a Alexander Marusch wobźěłałej. Za pśełožk a rědnu wejsnu rěc jo Fabian Kaulfürst zagronity był.

Wětšy źěl woglědarjow jo teke bźeze słuchatkow pśi temperamentnej a luštnej inscenaciji swój špos měł – to su pokazali z głosnym smjaśim. Pśecej jo něco na jawišću ale cesto teke pśed jawišćom se stało. To jo młogi raz ga dopomnjeło na pśedstajenja něgajšneje hochoskeje grajaŕskeje kupki.