Z Města/Cottbus. W Dolnej Łužycy jo nowa iniciatiwowa kupka notna. Ta dejała se staraś wó nastupnosći dolnoserbskego kubłanja. Toś to dopóznaśe njejo nowe, ale jo se njedawno cele jasnje a direktnje wugroniło. Póstark k tomu jo dała slěźeńska źěłaŕnja w konferencowem rumje wótźělenja za regionalne wuwiśe a mjeńšynowy šćit Serbskego instituta (SI) w Chóśebuzu k temje „Serbska rěcna wucba w Bramborskej – eksploratiwna analyza a komentěrowanje kubłańsko-statistiskich datow“. Njeglědajucy na to, až su pśibytne załoženjeju iniciatiwneje kupki pśigłosowali, jo wóstało to rozsuźece pšašanje, chto dej ideje za taku kupku wuwiś a chto dej ju załožyś, mimo wótegrona.

Pśepšosenjeju togo wótźělenja SI jo slědowała pódla tam statkujucych sobuźěłaśerjow gjarstka zajmcow. Wóni su pśedewšym z praktiskego wida na informacije referenta dr. Lutz Laschewski glědali. Wón, wjednik togo wótźělenja, jo wopisał w swójom pśednosku wobźělenje na wucbje serbskeje rěcy w Bramborskej, a to na zakłaźe wót zjawnje pśistupnych statistikow.