Z Ljubljany/Lubljana. Se wě, až ma Ljubljana ako jadno z europskich głownych městow bogate kulturne žywjenje, juž gaž myslim na styri pówołańske źiwadła a někotare mjeńše druge, na operu z orchestrom, na dwa sinfoniskej orchestra a jazzowy Big Band rozgłosa, na wjelike muzeje a Narodnu galeriju a radnu licbu drugich wuměłskich galerijow. Ale weto jo něco wósebnego, až mamy tudy rownocasnje dwě wustajeńcy z njepósrědnym zwiskom k Serbam! Dnja 14. měrca 2024 běšo wótwórjenje noweje wustajeńce „Skrito in razkrito“ (schowane a wótkšyte) wjelebocnego a teke we Łužycy derje znatego korutańskego wuměłca Karla Vouka w galeriji Zwězka towaristwow słowjeńskich twórjecych wuměłcow (SDSLU). Jogo nejnowše twóŕby dopomnjeju na pradawne abo teke nowocasne pśisamem abstraktne maski a su jadna forma assemblage, ga su zestajone ze slězynu rozdźělnych barwow a materialow a górjej napóranymi samymi „maskami“, kótarež su pópšawem distancne kartonowe elementy sixpackow za wino, pótakem tak pomjenjony ready made.