Wó temje zjadnośenje Nimskeje jo se w běgu 30 lět wjele pisało a wózjawiło. A se zda, až tencasna wobšyrna a hyšći trajuca towarišnostna změna wósebnje za „Ossijow“ – „pódzajtšnikow“ – dalej zajmna jo a pó wšakich wašnjach se wopišo a pśedstaja. Dajo wobšyrne pórucenje – rozpšawy, awtentiske powěsći, krotše a dlejše wopisanja rownikow. Mjaztym pak jo tema teke nowych awtorow nawabiła, kótarež socialistisku DDR a cas pśewrota do kapitalizma njejsu dožywili a je jano z powědanja znaju. Kak by se mógł toś ten literarny stil pomjenjowaś – basnistwo a wěrnosć? Cele hynac w knigłach, kótarež su kóńc zajźonego lěta pód titlom „Alle meine Leben – Dokumente eines Ossis“ wujšli. Awtor Hellmuth Henneberg, lětnik 1958, žurnalist a kulturnik, pśedstajijo a wopišo swóje dopomnjeńki wjelgin awtentiski z datami a faktami. Naroźony w Barlinju, jo wón w Rostocku wótrosł a w Lipsku žurnalistiku studěrował. Jogo prědne pówołańske městno běšo pla telewizije DDR w Barlinju, ako cłonk młoźinskeje redakcije a redaktor młoźinskego wusćełanja „KLIK!“.