Z Kósmejc/Jocksdorf. Južo pśed jatšami dožywijomy lětosa rědne nalětne wócuśenje. To słyńckowate wjedro wužywa wjele luźi, pśedewšym starjejše ze źiśimi, za woglěd do nałpowego zwěrjeńca w Kósmejcach. Teke zwěrjetam se spódoba śopłe wjedro. Kak wóni se na słyńcu pśeśěguju, dajo młogi luštny fotowy motiw. A woglědarje se waže teke měr wokolneje pśirody.

Tuchylu maju we tom zwěrjeńcu wósym družynow nałpow (za nich njamamy serbske pomjenjowanja, tak naspomnjejomy pśikłady nimski: Weißschulterkapuzineraffen, Weißbüscheläffchen, Goldkopflöwenäffchen, Brazza-Meerkatzen), jich jo dogromady 58 zwěrjetow. Nejmłodšy dorost maju nałpicki ze złotymi lawowymi głowkami („Goldkopflöwenäffchen“). Te skokaju a se gónje pó gałuzach. W tropowem domje su tek eksotiske ptaški k wobźiwowanju. A dalšne zwěrjeta se źarže na derje woplěwanych gruntach pód gołym njebjom, źož dajo teke grajkanišćo a dalšne atrakcije.