Z Budyšyna/Z Hochozy/Bautzen/Drachhausen. Hochoza jo wjas, kótaraž jo wjele lět kšuśe zwězana z dolnoserbskim źiwadłom. Rowno dla togo pšosy Nimsko-serbske ludowe źiwadło z Budyšyna tamkor pšawidłownje kužde lěto na dolnoserbsku prapremjeru swójich źiwadłowych kusow. Lětosa buźo to sobotu, 13. apryla. Tenraz pak njejsu kus z górnoserbšćiny pśełožowali, ale su na zakłaźe dolnoserbskego wulicowańka „Smjerś pó štuckach“ z pjera Marcusa Kóńcarja błośański krimi na jawišćo spórali.

W toś tej grajnej dobje swěśi budyšyńske źiwadło mimo togo někotare jubileje a narodniny: 75 lět serbske pówołańske źiwadło, 60 lět Nimsko-serbske ludowe źiwadło a poł stolěśa ducy ze źiwadłom w Dolnej Łužycy. Južo w lěśe 1951 jo Serbske ludowe źiwadło k prědnemu, bóžko jadnučkemu razoju w dolnoserbskej rěcy grało a pón dłujke lěta nic wěcej. Ale wót 1974 grajo budyšyńske źiwadło až doněnta pšawidłownje kužde lěto na jawišćach w Dolnej Łužycy.