Młody muzikaŕ, komponist a producent Syman Hejduška grajo z wutšobu a dłymokim zacuśim na bijadłach (Schlagzeug) a klawěrje, jo južo na wjele kulturnych zarědowanjach a rejach młodych a staršych luźi zapalił. W něgajšnem bydlenju swójeje zemrěteje starkeje w Hórkach (Horka) dajo se wón wót zachopjeńka lěta do togo, aby sebje w dwěma śpoma natwarił swójske muzikowe studijo. „To jo mójo dawne cowanje, ako cu něnto skóńcnje zwopšawdniś“, groni 28-lětny Syman Hejduška.
Wobej rumnosći wuglědatej tuchylu hyšći ako twaŕnišćo. Syman wulicujo, až buźo se wugótowaś jadnu rumnosć z mikrofonami za nagrawanje spiwow a instrumentalnych twóŕbow a w dalšnej co pótom muziku producěrowaś. „Mě pomagaju teke mójej starjejšej, staršy bratš a dalšne luźe pśi pśetwari. Naźejam se, až budu how až do kóńca lěta prědne produkcije móžne.“