Z Chóśebuza/Cottbus. Tyźeń wałtoru jo Dolnoserbski gymnazium zastupnikow serbske institucije na tradicionelne kubłańske wiki pšosył, aby pśichodnych absolwentow za pówołanja na serbskem pólu wabili. Glědajucy na wusoku licbu wupisanych lichych źěłowych městnow w serbskich institucijach a na brach serbskich ceptarjow a wótkubłarjow jo tema serbskego dorosta rowno ze žrědła serbskego kubłanja dobyś, wjelgin wažna tema.

We awli gymnaziuma jo komisariski šulski wjednik dr. Matthias Guttke zastupnikow z 12 institucijow – mjazy nimi ABC, Załožba za serbski lud a Šula za dolnoserbsku rěc a kulturu – ako teke wuknice a wuknikow 11. lětnika wuwita. Pótom jo redaktor serbskego programa pśi rbb Gregor Kliem jim dał wobšyrny póglěd do pówołańskich móžnosćow na serbskem pólu, ale jo teke na wósebny profil šule pokazał a z tym zwězanu zagronitosć. Pśi tom jo rěcny projekt Zorja pśedstajił, w kótaremž by mógli absolwenty swóje znaśa serbskeje rěcy pólěpšyś a rownocasnje něco pódobnego ako FSJ-lěto pó serbskej wašni dožywiś.