Detlev Rein, Judit Šołćina, Jana Piňosová, Heiko Kosel a Leoš Šatava (wótlěwa) su w tśeśej Serbskej debaśe wó tom diskutěrowali, lěc daju se Serby definěrowaś ako „indigeny lud“. Rozwězali njejsu to pšašanje, ale su byli wobjadne, až mjeńšynowy šćit dejał se zapśěgnuś do Nimskeje zakładneje kazni. 
Z Budyšyna/Bautzen. Wó temje „Chto my smy – indigene, awtochtone abo něco drugego?“ su wugótowali srjodu, 20. měrca, Saska krajna centrala za politiske kubłanje, Serbski institut (SI), Serbske Nowiny a Załožba za serbski lud tśeśu Serbsku debatu. Na podiumje w zalu budyšyńskego Serbskego doma su diskutěrowali pšawiznik a cłonk Serbskego sejma Heiko Kosel, jadnaŕka Domowiny Judit Šołćina, etnolog prof. dr. Leoš Šatava a dr. Detlev Rein, něgajšny wjednik Referata za mjeńšynowu pšawu a mjeńšynowu politiku Zwězkowego ministaŕstwa za nutśikowne.
sobota, 27.04.2024
