Z Budyšyna/Bautzen. Wałtoru, 19. měrca, su se cłonki prezidiuma Domowiny pó dlejšem casu zasej „live“ w Budyšynje zmakali. Wóni su pśigótowali mjazy drugim pśichodne pósejźenje zwězkowego pśedsedaŕstwa, ako buźo 12. apryla w Dolnoserbskem internaśe w Chóśebuzu.

Cłonki prezidiuma su wobzamknuli wótere delegěrowanja. Mjazy drugim: Kupka Serbska reja buźo wustupiś na seminarje źěłoweje kupki „non-kin state“ kšywoweje organizacije FUEN, kenž buźo wót 23. do 26. apryla w Lubnjowje. A lubnjojske towaristwo „Rubiško“ se wobźělijo wót 7. do 9. junija 2024 w měsće Wangen w Baden-Württembergskej na lětosnem nimskem drastwowem swěźenju. Ten se wótmějo w ramiku krajneje zagrodoweje pśeglědki.

Žedno pótajmstwo njejo, až buoźe znowa Mjazynarodny folklorny festiwal „Łužyca/Łužica“. Pótajmne pak hyšći jo, chto buźo jen dalej nawjedowaś. Pjerwjejšny wjednik Marko Kowar jo se łoni z teje funkcije rozžognował. Cłonkow do pśigótowańskego wuběrka za festiwal pówołajo Zwězkowe pśedsedaŕstwo Domowiny. Zjawnosć musy toś hyšći do pśiducego wobradowanja sćerpna byś.