Z Kśišowa/Bórkow/Krieschow/Burg. Sobotu, 24. februara, su studentki dalejkubłanja na ceptaŕstwo pśewjadli swóju šestu ekskursiju pó Dolnej Łužycy. Wóni su pśišli w ramiku modula kulturne wědomnosći, ako ma na starosći dr. Madlena Norberg, w nadawku Instituta za sorabistiku w Lipsku. Droga jo studentki tenraz wjadła ako prědne do Kśišowa. Tam su woglědali něgajšnemu wjednikoju Dolnoserbskego internata a rownocasnje něgajšnemu wobydlarjeju wótbagrowaneje Tšawnice, Waldemaroju Lobertoju. „Waldi“ jo maminorěcny a jo se rědnje rozgranjał ze studentkami a jich teke wjadł pó swójich kšasnych nalětnych gruntach. Skóro tśi góźiny smy póbyli pla njogo. Za to jomu hyšći raz nejwutšobnjejšy źěk!