Ze Žylowa/Sielow. Kradu pśed lětom jo se wjednica žylojskeje zakładneje šule „Lutki“ ze słužbu rozžognowała, dla wjaselecego tšojenja. Pó pawze dla póroda swójogo drugego góleśa jo Madline Gjarźic we februarje, k drugemu šulskemu połlětoju, zasej do słužby stupiła. Ku tej góźbje jo Georg Zielonkowski ju interviewował.
Nejpjerwjej wutšobnu gratulaciju Wam k drugemu góleśeju. Pšašamy se, lěc jo se Wam felowała ta kopica źiśi, za kótaruž sćo wacej zagronita?
Prědny raz, w prědnych tyźenjach, w kótarychž som jano móju familiju wokoło sebje měła, jo mě namdušu wjelike žywjenje našogo šulskego doma felowało. Cesto su se móje mysli wen z domacnego wobłuka do Žylowa chylili. Ale ako som pón drugi raz mama wordowała, jo było wšykno hynac. Wót togo wokognuśa jo była mója familija za mnjo centrum wšych myslow.
Na zachopjeńku drje se zda, až su starjejšyne słušnosći pśisamem brěmje, gaž jadno góle jo w prědnej rědowni a to druge jo nowo naroźone a trjeba starjejšej stawnje. Pśikšadnjo se pón wótergi mysl, až to źěło w šuli jo mjenjej napinajuce? Až dajo póžedanje za šulskim źěłom?