Z Chóśebuza/Cottbus. Stwórtk wjacor jo se dr. Křesćan (Christian) Kessner, psychoanalytikaŕ z Drježdźan, pśezpołdnicy z dłymokopsychologiskego wida pśibližył, a to w ramiku zarědowanja Dolnoserbskeje biblioteki w Serbskem domje. Zapśimujucy pśednosk jo Chóśebuzaŕ Sven Meyer z milnymi gitarowymi zukami wobrubił. Pó wótwórjeńskich słowach bibliotekarja Bernda Pittkungsa njejo se dał psychoanalytikaŕ z górnoserbskimi kórjenjami wześ, zawjeźenje do swójogo pśednoska w dolnoserbskej rěcy zwónoźeś.

Wón jo se ze snaź nejznatšeju powěsćoweju figuru serbskeje mytologije zaběrał, z pśezpołdnicu. Wóna jo teke ako pśirodny duch abo bogowka w słowjańskem swěśe, w Pólskej pód mjenim południca, w Českej polednice, w Słowakskej poludnica, znata. We łužyskich bajkach jo wóna cesto zła, ale młogi raz pokažo se jej dobry bok abo wóna jo ga se wumóžyła. Co su naše prědowniki we njej wiźeli? Cogodla wóna nas źinsa hyšći fasciněrujo? Z tymi pšašanjami jo se dr. Kessner wót instituta C. G. Junga w Šwicaŕskej rozestajił.