Z Města/Cottbus. Bramborska Serbska rada pśewjeźo swóje wob-radowanja za wětšy źěl w Pódstupimje – w domje, źož „sejźi“ bramborski krajny sejm, kótaregož gremium ga Serbska rada jo. Na swóje 36. pósejźenje w něntejšnej legislaturnej perioźe 2019-2024 pak su byli cłonki a gósći 12. měrca pśepšosone do Chóśebuza, a to do domu Dolnoserbskego gymnaziuma. Z tym jo było jasne, až jo kśěła Serbska rada se tenraz tšochu dlej zaběraś ze situaciju na tej nejwažnjejšej a nejwětšej serbskej šuli w Dolnej Łužycy a docełego ze serbskim šulstwom. Togodla su byli k tomu teke kazane zastupniki serbskich šulskich institucijow a Domowiny.