Z Rownego/Rohne. Pónjeźele srjejź febrauara jo se na Njepilic dwórje startowało dwójodnjowne pjerjedrěśe. 26 pilnych žeńskich jo pśichwatało na prědnu rundu, druga runda jo była pśiducy źeń. Teke telewizijny team wót sćelaka MDR jo se pśinamakał, aby filmował tamne tšojenja. Aline Ander-Lepschowa wót „Sachsenspiegel“ jo pilnje sobu drěła pjerje. Rolu jo teke grała škla połna pyšnych jatšownych jajow, pśeto z kósyłkami deje se jaja wupyšniś. Inge Muschalekowa jo to rozjasniła cele dokradnje moderatorce wót MDR.
Pśedsedaŕ Spěchowańskego towaristwa „Njepilic dwór Rowne z.t.“, Manfred Nickel, jo we interviewje pšašanja k nałogoju pjerjedrěśa wótegronił a teke wó woplěwanju nałogow na Njepilic dwórje w běgu lěta wulicował. Wón jo, pó pšašanju, gronił, až te połnjone zagłowki a płachty su wjelgin woblubowane a až to buźo źeń a śěžčej, tym skazanjam docyniś. Južo pónjeźele wjacor su mógali žeńske se wiźeś w „Sachsenspiegel“ a su tak sami wiźeli, kak pilne su pśez cełe wótpołdnjo byli.