Lětosa 10. měrca by Arnošt Muka swój 170. narodny źeń swěśił. To jo dobra góźba, se dopomnjeś na jogo pśesegajuce wugbaśa na serbskem pólu. Arnošt Muka jo był rěcywědnik, ludowědnik, sociolinguist ako teke literat, což njejo wósebnje znate. Wón jo był spěchowaŕ wšogo serbskego a nejwažnjejšy zastupnik serbstwa w swójom casu w tu- a wukraju.

Což Dolnu Łužycu nastupa, njejo jogo zajm za nju był někaka wěc profilěrowanja, ale pśez wuske zwiski ze wšakimi luźimi jo wón situaciju derje znał a jo kśěł pomogaś. Tak jo teke we swójej wjelikej statistice wó Serbach (1884-1886) samorozmějuce zapśěgnuł Dolnu Łužycu a jogo wopisowanje kuždeje jsy tegdejšego sedleńskego ruma jo až do źinsajšnego njewuzbytne žrědło za stawiznarjow a chronistow. Mimo statistiskich datow wopisujo kradosćiwje cełu demografisku situaciju, nałožowanje serbskeje rěcy, staw nosenja serbskeje drastwy a samo architektoniske wósebnosći. Toś ta statistika pśedlažy mjaztym teke w nimskej rěcy.