Sobotu, 16.03.2024, zeger 13:30 – 14:00, w rbb telewiziji

(we interneśe pód www.rbb-online.de/luzyca)

Serbski magacin „Łužyca“ jo tenraz na slědach „Odrinych Serbow“. Toś ta narodna mjeńšyna jo žywa na pódpołdnjo Frankobroda nad Odru a jo se pśisamem dopołnje wótzabyła. Togodla se moderator Christian Matthée wupórajo pó jeje slědach póspóromje rěki Odra. Slědy jogo wjedu do pólskego Urada, do wjaski na drugem brjogu Odry, zwótkulž jo napśeśiwo wiźeś Aurith na Odrinem ługu.

Pótomniki Odrinych Serbow su musali ten teritorij pó drugej swětowej wójnje spušćiś. Weto jo se raźiło, wuchowaś źěle domacneje drastwy. We Ziltendorfje we drastwinej šlodaŕni šyjo Cordula Bahro pó historiskich pśedłogach drastwu a wótžywijo samo teke tradicije. Zajmne stawizny Odrinskich Serbow gódnośiju historikarje něnto teke zasej nowo.

Hynac ako pla Odrinych Serbow su serbske nałogi we Dolnej Łužycy rowno we tych dnjach wjelgin žywe. W Dešnje dožywijo wobźělnica rěcnego projekta „Zorja“ zapust tak intensiwnje ako žednje. Pó intensiwnych mjasecach wuknjenja móžo ga něnto teke pśi swěśenju serbowaś.