Spěchowańske towaristwo za serbsku rěc w cerkwi z.t., kótarež wóswěśijo na nowy mjasec swójo 30-lětne hobstaśe, jo se južo ze wšakorakimi śišćami zapisało do serbskego pismojstwa. Z jogo pódeprěśim su se w dolnoserbskej rěcy mjazy drugim hudali Duchowne kjarliže (2007), Dolnoserbske perikopy (2011), Biblija 2020 a zbasnjona Kśicowa droga „Pó droze śerpjenja a wěry“ (2022).

Kóńc zachadnego lěta jo Spěchowańske towaristwo za serbsku rěc w cerkwi z.t. hudało nowe knigły w tśich rěcach „Ze źiśimi se módliś – Mit Kindern beten – Modlitwy dla dźieci“. Pśipódla gronjone jo to rowno było 475 lět pó tom, až faraŕ Mikławš Jakubica w Lubanju jo zakóńcył dolnoserbski pśełožk Nowego testamenta.

Zajmce mógu nowe knigły ze źiśecymi módlitwami dostaś w Serbskej kulturnej informaciji „Lodka“ w Chóśebuzu, w Smólarjejc knigłaŕni w Budyšynje abo direktnje wót spěchowańskego towaristwa w Měsće.

Běrtyl lěta jo zajšło a prědne cytarje a hužywarje su nam pósrědnili swóje měnjenja a nazgónjenja. Te comy how rady w někotarych hurězkach wózjawiś: