Z Brězowki/ Halbendorf. Sobotu pśed dwěma tyźenjoma jo słyńcko do rědneje pśirody wabiło. K zymskemu wandrowanjeju wokoło Brězańskego jazora jo rěcny projekt ZARI (Za regionalnu identitu), projekt Domowiny za rewitalizěrowanje serbšćiny w srjejźnej a Górnej Łužycy, jadnab 20 luźi pśichwatało. „Tak wjele hyšći nigdy njejsmy byli“, jo se wjaseliła organizatorka Juliana Kaulfürstowa, wót lěta 2023 motiwatorka za serbsku rěc za region Slěpe a Wochozy. Za dwěgóźinske a 6,5 kilomejtari dłujke wandrowanje wokoło Brězańskego jazora su wobźělniki dostali zaspomnjeńku z wokablami, sadami a dwa wandrowańskej spiwa. Samo QR-code jo na njej stojała. „Tak móžo kuždy wokablam a sadam ako zukowe nagrawanja hyšći raz doma w měrje pśisłuchaś“, jo groniła organizatorka, kótaraž jo take rěcne wandrowanje južo stwórty raz pśewjadła.