Z Gołbina/Gulben. Taki kóńc tyźenja z camprowarjami a zapustami se nježywi jano wót wobźělnikow. Ceła wjas jo ducy. Wjele pilnych rukow jo se wobraśało w slězynje, aby teke w Gołbinje 17. a 18. februara zymu wugóniś mógli.

Južo tyźenje a dny do togo su se za to na wšaki part pśigótowali: Jaja glucnych kokošow su se zezběrali a se na jajowy liker pśeźěłali. Zgromadny wejsański dom a teren kołowokoło su na błyskotanje wurěšyli a grabali. Samo fotowu tribunu z pśiwisnikow a paletow su natwarili, a mały stan za wjacor bu stajony.

Teke młoźina njejo sejźeła z nogoma pód blidom, ale jo južo wót gód treněrowała rejowańske nogi a spiwne głose. Za to su swójske małe spiwnicki wužywali, ako su se pó dłujkem procesu łoni dogótowali. Z toś tym spiwnikom su se młode a stare pótom tyźeń pśed zapustom k zaspiwanju zmakali. Ze starymi a nowymi spiwami su se na zapustowy kóńc tyźenja nastajili. Ale bóžko jo žwała chórosći někotare k tomu nuzkała, we śopłej póstoli wóstaś.