Z Drjejc/ Drewitz. Dnja 17. februara su we Drjejcach ze 49 pórikami zapust swěśili. Slědny zapust jo tam w lěśe 2018 był, pón jo dłujka pśestawka slědowała. Dla togo su Drjejcanarje ako jubileum z młodymi a starymi wobydlarjami swěśili. Pópšawem jo južo w lěśe 2023 zapust planowy był, ale bóžko jo kapała krotkocasnje wótgroniła, dla togo jo drjejcańska młoźina wót togo casa chopiła pjenjeze za pśiducy a wjeliki zapust zběraś. Dnja 10. februara su wóni we jsy camprowali, aby dosć pjenjez za zapust zezběrali. To jo młoźina južo w zachadnem lěśe cyniła, ako jo jasne było, až w lěśe 2023 žeden zapust njejo. Lětosa su „Strobicańske měsćańske muzikanty“ sobu maršěrowali a wjele rědnych spiwow grali, pó kótarychž su zapustowe póriki rejowali. Startowali su zapustarje pśi sportowem domje w stanje, dokulaž Drjejce njamaju kjarcmu. Ako prědne jo šefowka młoźiny wšyknych wuwitała a pón su druge cłonki młoźiny jeje słowa do serbskeje rěcy pśestajili. Pón su śěgnuli pśez wjas a prědnu staciju woglědali. Druga stacija jo cerkwja była.