Z Lubnjowa/Lübbenau. Wokrejs Górne Błota-Łužyca swěśi swóje žeńske. Ku góźbje Bramborskich žeńskecych tyźenjow se wótměju wšake zarědowanja w casu wót 1. do 31. měrca w cełem kraju. We wokrejsu startuju akciske tyźenje sobotu, 9. měrca, zeger 14:30 ze zarědowanim pód motom „Mehr als eine Tracht/Wěcej ako drastwa“. Wjerašk togo dnja buźo jubilejna modowa pśeglědka „10 lět Wurlawy“ designaŕki Sarah Gwiszcz, zeger 19:00 na Pyšnem jawišću (Bunte Bühne) w Lubnjowje.

Bramborski moto za lětosne žeńskece tyźenje jo „Dit könn‘ wa besser!“. We wokrejsu Górne Błota-Łužcya stoje drastwy serbskich žeńskich we srjejźišću, nic jano ako woblacenje, ale teke ako wuraz identity a zwězanosći k domowni. Dla togo wustupijo na wótwórjeńskem zarědowanju chor Łužyca, w kótaremž kužda spiwaŕka nosy swóju domownisku serbsku drastwu. Pódpěru dostanjo chor wót Lubnjojskego towaristwa Rubiško, kótarež prezentěrujo dolnoserbske drastwy ze wšakich wósadow w ramiku drastwoweje pśeglědki.