Z Města/Cottbus. Gaž se raz woglědamy Domowinske kupki w župje Dolna Łužyca – jich jo tuchylu nagromadu 40 z něźi 1.300 cłonkami-, pón su wóni pó starstwje swójich cłonkow wjelgin wšakorake. Mamy źewjeś kupkow jano z młoźinu (ta nejnowša jo ta w Pśiłuce ze pśisamem 30 cłonkami). Pón su take, źož su cłonki głownje we srjejźnych lětach, a pón bóžko take, źož su cłonki we wjelikej licbje južo „na wuměńku“ abo krotko pśed tym.

K tym slědnym słuša Domowinska kupka w Chóśebuzu, kótaraž jo nastała pó lěśe 1990 z něga tśich mjeńšych měsćańskich kupkow. Gaž jo se wóna 8. februara zmakała w Serbskem domje k swójej głownej zgromaźinje, jo rowno to grało wósebnu rolu. Dłujkolětna pśedsedaŕka Sabina Siegowa jo k tomu znate cyniła wšake licby. Wót tych něntejšnych 72 cłonkow jo jich to jano pěśo pód 50 lětami! Wušej 70 lět jo jich to 37 a wušej 80 lět samo 17! A tśi su starše ako 90 lět! A ta nejmłodša jo 34 lět!