Z Kósobuza/Kunersdorf. Z takim rědnym wjedrom zawěsće njejsu k 114. zapustoju, sobotu, 10. februara, w Kósobuzu licyli: słyńco jo mócnje swěśiło, napśeśiwo zachadnym dnjam njejo se žedna mrokawa pokazała, a pśiglědarje a zapustarje su w swěźeńskem stanje bejnje do znoja pśišli. Skóńcnje su pó krotkem serbskem wuwitanju nejpjerwjej camprowanje młoźiny a wóženjonych wugódnośili a su wuspěšnych zběrarjow pjenjez z małymi darikami pócesćili. Pótom jo se kopica luźi ze śopłego stana malsnje wen pórało, aby na drugem boce wognjoweje wobory kupku zapustarjow wótmólowało.