Ze Škódowa/Skadow. Njeźelu napoł jadnogo, ako jo młoge źowćo w serbskej drastwje pśed Širgotojc gósćeńcom hyšći kłobykowu pychu swójogo partnarja pitśku do rěcha spórało, jo dešć rowno tšochu wopśestał. Naźeja, až wón wuwóstajijo, pak njejo se społniło. „Take špatne wjedro južo dłujko njejsmy w Škódowje pśi zapusće měli“, jo z woblutowanim gronił Christian Kamenz, kenž gromaźe z Anniku Tolksdorfojc škódojsku młoźinu nawjedujo. Źeń pśed tym, ako su camprowali, su hyšći nejrědnjejše nalětne słyńco ako pśewóźowarja měli.
Něźi 65 cłonkow ma tuchylu škódojska młoźina. A k wobźělenju na zapusće jo se pśinamakała, wšak změstymi tek z drugich jsow, rědna licba 26 pórow. Nowych tenraz njejsu ku góźbje zapusta pśiwzeli. Te aktualne nowacki su južo łoni ku góźbje kokota do młoźiny zastupili. A chtož jo něnt prědny raz na zapusće se wobźěliś kśěł, tomu jo pomagało pětk to gromadne zwucowanje zapustowych spiwow w młoźinskem rumje. Pśigótowanje na wjasoły swěźeń ga musy byś, a daś to tek buźo dešćowaty zapustowy źeń!