Z Města/Cottbus. Stwórtk, 1. februara, jo se wótměł na Dolnoserbskem gymnaziumje w Chóśebuzu lětosny zapust. Pśi toś tom nałogu su se zasej wobźělili wuknice a wukniki 12. lětnika serbskeje šule. Dogromady jo se wobźěliło 22 pórow pśi pśeśěgu pó měsće.
Pśigótowanja za ten źeń su se južo jěsno zachopili a pśedwjasele jo było wjelike. Nałog jo se startował na šulskem dwórje z wumaršěrowanim, rejowanim, spiwanim a z nagronom dweju wuknikowu pśed pśiglědarjami. Pśewóźony wót wšakich telewizijnych a radiowych sćelakow su wuknice a wukniki pśez město k sponsoram šli. Atmosfera a špos stej wót stacije k staciji pśiběrałej, głosneje muziki a spiwanja dla. Nejwěcej jo se spiwało pla serbskich stacijow a sponsorow. Ale teke pla wušego šołty Tobias Schick jo wjasele wjelike było z wutšobnym nagronom šołty. Na Starych wikach jo se tak ako kužde lěto kupkowe foto cyniło. Rědnosć drastwow, źowćow a mócny entuziazm zapustarjow su se Chóśebuzarjam wjelgin spódobali, nejwětšu zagórjetosć su luźe w Blechenowem kareju pokazowali. Na kóńcu zapusta su se wuknice a wukniki glucnje do šule wrośili.