Z Nowa Niwa/Neu Zauche. W Nowej Niwje jo wažne, až młoźina móžo wutrajnje stojaś, sejźeś a rejowaś. Hyšći wažnjejše jo, až młoźina se pśiswój tudske dalejdane tradicije – a nic dla togo, až se to wót nich pomina, ale dokulaž jim to na wutšobje lažy.

Šefowka młoźiny Romy Lehmannojc jo rozjasniła: „My njejsmy towaristwo, ale wiźimy se zawězane, to dalej wjasć, což su naše starjejše a stare starjejše južo pśed nami woplěwali.“ Gromaźe z drugeju šefowku Carolin Kochojc jo wóna tudski zapust akribiski pśigótowała, jo kuždu małku pódrobnosć napisała a pśez WhatsApp drugim k wěsći dała. Wobej šefowce stej wuknjeńcy w medicinskima pówołanjoma. Stej se wzeli cas za organizaciju wejsneje tradicije a se zasajźiju ze zapalonosću za wuspěch swěźenja.

Srjodu wjacor (31. januara) su zachopili, struski pśitykaś: „Gólcy: kłobyk pśinjasć. Źowća: Glicku, nitku, banśiki“, take jo było dopomnjeśe za toś te zarědowanje. Za tym až jo była muskeca młoźina zastarana, su dejali juž raz se stajaś swóje kłobyki: Nowoniwański zapust 2024 jo se wótwórił.