Z Kózlego/Casel. Ducy pó Kózlem malsnje nadpadnjo woglědarjeju teke mała, zacowana cerkwja. Glědajucy na nju móžoš se mysliś, až stojš pśed kulisu historiskego filma. Wopšawdu jo wóna wjelgin stara a stoj pód šćitom pomnika. Natwarili su ju w 13. stolěśu ako katolsku putnikowańsku cerkwju. Póznogotiske, pšawokutne twarjenje to jo, wobstojece z pólnych kamjenjow. Pódwjacorny pókóńc (Giebel) su něźi we 18. stolěśu rozšyrili z barokowym kšywowym tormom. Wokna su se nejskerjej změnili, mógu se zarědowaś do casa baroka. Ale zachod z póšpicnym wobłukom jo hyšći originalny. 1985 jo grozyła cerkwja se do kopice kidnuś, dokulaž pódzajtšna pókóńcowa sćěna jo se mócnje schyliła. To jo zwisowało ze spadom spódneje wódy pśez te susedne brunicowe jamy. Jano z pódpěru Kózlanarjow a pjenjezne pósćiwanja jo mógała se cerkwja saněrowaś. Južo lěto pózdźej, 1986, jo se ta cerkwja z dwójnym dupjenim zasej wuswěśiła. 1998 jo se teke barokowe nutśikowne wugótowanje restawrěrowaś jo mógało.