Pšosymy wó wózjawjenje cytaŕskego lista pśedsedarja Domowiny Dawida Statnika ako wótegrono na list Měta Nowaka, dnja 8. februara w Nowem Casniku.

„Wólby Serbskeje rady w Bramborskej su nastupnosć Dolneje Łužyce. Domowina ako kšywowy zwězk pak pśewjeźenje wólbow zagronijo. Jasnje jo, a to tež hynac z rozgronow ze župu, Serbskeju radu a našym zastojnstwom njejsom wusłyšał: wšyknym jo wažne, až se wuzwólowanje pśichodneje Serbskeje rady raźiju. Pśigóty za to běže.

Awtor cytaŕskego lista njejo pśi rozgronje pśibytny był. Žurnalista, kótaryž jo fakty – tež z mójogo wida sem – źělnje wopak zasej pódał, kritizěrujo. Rownocasnje pak se na jogo wuwjeźenja zepěra. To mě źiwa, dokulaž som nawězujucy na artikel z awtorom cytaŕskego lista telefoněrował, aby jogo wó zmakanju informěrował. Widobnje njewuspěšnje.