Z Města/Cottbus. Južo pór mjasecow zmakaju se lubowarje ludowych rejow pšawidłownje, aby w ramiku Rejowańskego doma Łužyca rejowali. Tenraz, rožowe pónjeźele, pód motom „zapustowa reja“ z live-muziku kupki „Serbska reja“ jo se jadnab 40 luźi wobźěliło, młoge w kostimach, młoge w serbskej drastwje. Mjazy nimi wjele studentow, ako su prědny raz pódla byli. Zal w Melde–Wili jo se južo na zachopjeńku połnił, ako su w krejzu pó tśoch rejowali. Aby zachopjeńkarje mógali kšacam slědowaś, stej Gregor Kliem a Beth Fogleman sćerpnje kuždy pógib pokazałej a rozkładowałej. Pótom su ukrainsku reju nazwucowałej, ako jo měła „źiśecy źěl“. Rejowańskej partnarja stej se pó pór kšacach mjazsobu wótklatśkotałej.
Wjerašk wjacora jo pak był amerikański walcyk a two step. Wó historiji amerikańskego karnewala „Mardi gras“ w New Orleansu a z tym zwězanej tradicionelnej „Cajun“-muzice tam bydlecego frankorěcnego wobydlaŕstwa jo z USA póchadajuca Beth Fogleman wulicowała, a pó tom z drugimi rejowała.