Z Lěska/Lieskau. W Lěsku, blisko Slěpego, kśě te nejmłodše rowno tak camprowat hyś kaž te dorosćone. Dłujku tradiciju ga ma to camprowanje w Lěskowje a pokažo dobre gromaduźaržanje tudskego wobydlaŕstwa wót wjele lět. Pśeto to su te starjejše, ako ten rědny źeń za źiśi pśigótuju a je teke pśewóźuju.
A tak su sobotu pyšne, małe camprowarje pó Lěsku śěgnuli. Pśijaznje buchu wóni pówitane pśi wrotach. Zběrawki su klapotali. Mimo pjenjez su se teke druge wěcy pśepódali, a mała šwita jo se wjaseliła. Pjenjeze deje byś za wětšy źěl wužywane za źiśecy swěźeń, kenž planuju ku góźbje wejsnego jubileja „550 lět Lěsk“ kóńc maja abo zachopjeńk junija. Źěl pak deje teke za dalšne zarědowanja byś, na pśikład ku gódam. W Lěsku njamaju źiśownju a togodla organizěruju take wjeraški starjejše, towaristwa jsy a dobrowólna wognjowa wobora. Młoźinska wognjowa wobora pomaga teke pśi camprowanju a se stara wó wěstosć ducy.
Dogromady jo to była dožywjenja połny camprowański źeń za te małe. A to teke glědajucy na to, až jo to był prědny rědny śopły nalětny źeń w lěśe 2024!