Chtož wó nagłowniku pśemyslujo, daś tek

wó lapach pśemyslujo

Móžoš byś wšakego měnjenja, což nastupa kaznisku winowatosć nosenja nagłownika pśi kólasowanju – taku winowatosć tuchylu njamamy w Nimskej, ale Zwězkowe kněžaŕstwo pśemyslujo wó tom, to wobzamknuś.

Fakt jo: Gaby se to wobzamknuło, njebuźomy wěcej wiźeś žeńske w serbskej drastwje z lapu abo z rubiškom, ako na kólasu pó drogach ducy su – kaž na historiskich fotografijach. Pón by to był pokuśeński statk, gaby serbske žeńske bźez normowanego nagłownika na droze kólasowali. Njok powědaś we tom paźe wót diskriminacije, pśeto na drugem boce dej to zawěsćiś wěstosć wobźělnikow wobchada pśi pówušonej gustosći wobchada. Se wě, až to groni asimilaciju na jadnom boce a dalejwuwiśe na drugem boce. Serby w swójich drastwinych stronach se na ten part zawěsće něco kreatiwnego wumysluju. To same ga płaśi za wobstojecu winowatosć nosenja nagłownika na mopeźe abo za lichy cas pśi inlineskate.