Pónjeźele, 22. januara, jo był za hochoskich luźi wjelgin rědny a wažny źeń. Na Zelenem tyźenju ga su mógali pokazaś, kak bogate jo to žywjenje we tej serbskej jsy. Su pokazali nałogi a wšake serbske drastwy ze jsy, šołta Ronny Henke jo powědał do mikrofona rbb a źiśi su pśedstajili ptaškowu swajźbu (w górjejcnem rěźe). Młode judokarje su wójowali, žeńske su pśi pjerjedrěśu wó wšakem bachtali a publikumoju jo se wšykno wjelgin spódobało (dołojcny rěd). Fota: Tobias Unger 
Z Barlinja a Hochoze/Berlin/Drachhausen. Južo wjele lět wugótuju w Bramborskej centralny žnjowny swěźeń. Ten jo wjelgin woblubowany, wjele towzynt luźi co jen pśecej sobu swěśiś. Žeden źiw, Bramborska ga jo za wětšy part rolnikaŕski, burski, wejsny kraj. Mjazy tymi 18 jsami a městaškami, źož jo se toś ten žnjowny swěźeń južo wótměł, stej teke dwě serbskej abo nimsko–serbskej: Raduš/Raddusch (2017) a Dešno/Dissen (2011).
Za lětosa jo něnt ta tśeśa serbska wjas na rěźe! Hochoza w Picańskem amśe jo se wó to procowała, a wóna jo to teke dostała! To, což su Hochoske za to wšykno póbitowali, jo zagronitych w ministaŕstwje pśeznaniło (überzeugt). Swěźeń jo pópšawem jano za jaden źeń (sobotu) pśedwiźony, ale rowno tak ako w Dešnje kśě teke we Hochozy tśi dny za sobu „rušowaś“. Pśedwiźone jo za to ten cas wót 13. do 15. septembra (w slědnem Casniku smy bóžko pisali 10. do 15.)
