Z Pśiłuka/Preilack. Łoni su w Pśiłuku załožyli Domowinsku kupku tamneje młoźiny. Dotychměst słuša do njeje pśisamem 30 młodych luźi z teje serbskeje jsy blisko Picnja. Jeje pśedsedaŕ jo Markus Krüger, a ten jo był slědnu sobotu teke jaden z głownych organizatorow a wjednikow tamnego młoźinskego zapusta.

Pśed wjele lětami su se tam k zapustoju a k zapustowej reji hyšći zmakali we wejsnem gósćeńcu. Ten pak jo južo dlejšy cas zacynjony a rědnje napšawdu wěcej njewuglěda. Bóžko. Młoźina w Pśiłuku pak jo se wěźeła radu: za nju jo něnto dom wognjoweje wobory to zmakanišćo za zapust. Tam su se teke lětosa zgromaźiłi a pśed nim jo se teke zachopił ten wjasoły zapustojski ruš – z rejami, ze zachopjeńkom pśeśěga ze 19 pórami pó jsy, z muziku a to se wě, z małkim paleńcom za tych něźi 300 narskich pśiglědarjow ze jsy a teke ze susednego Turnowa (wobej jsy ga słušatej do jadneje gmejny). Tamkor ga su se pódali wjacor na zapustowu reju.