Z Janšojc/Jänschwalde. Młoda Janšowaŕka Silva Oehlertojc jo sebje kusk pó kusku pśecej wěcej z tym zaběrała, ze serbskeju drastwu wobchadaś a ju woplěwaś. Swóju wědu k tomu jo wót starkeje, Elfriedy Krügeroweje, pśewzeła, kótaraž jo ju južo ako małe góle woblekała. Z pśiběrajucym starstwom jo to jej pak śěžej pśišło, wótwardowanje a pśigótowanje drastwy nadalej na starosći měś. Tak jo Silva nawuknuła, kak ma swěźeńsku šorcu do ropow połožyś abo kak se swěźeńska drastwa wobleka. Južo, ako jo Silva małe źowćo była, jo jej starka pokazała, kak se wušywa.

„Mója starka jo wšykno wušywała: ruby, zagłowkowe nawlacenja a pśedewšym wšykno za drastwu. Rowno w zymskich mjasecach jo pśecej sejźeła a jo wušywała, hynac njejsom ju zewšym znała“, groni Silva w spomnjeśu.