Z Wjaski/Weskow. Kaž wšuźi we Łužycy se wjasele teke źiśi źiśownje „Hasenheide“ w grodkojskem měsćańskem źělu Wjaska na ptaškowu swajźbu. Swěźeń, pśi kótaremž se ptaški źiśam wuźěkuju za futrowanje w zymje, ma dłujku tradiciju we Wjasce. Na kuždy pad tak dłujko, ako wobstoj tudska źiśownja – to budu něnt 58 lět. Wót 32 lět jo wóna w lichem nosaŕstwje AWO, wobceŕkowy zwězk Bramborska pódpołdnjo.

We toś tej zymje, z teliko sněgom, jo było futrowanje namdušu wažna pomoc za te małe pikotace. Źiśi źiśownje „Hasenheide“ su sami ptaš-kowy futer pśigótowali. Pśi tej góźbje su wjele nawuknuli wó ptaš-kach, pśedewšym wó tych, kótarež w zymje pla nas wóstanu. Tak dostanjo pśigótowanje na ptaškowu swajźbu tek drogotny pedagogiski zmysł. Na grajkanišću źiśownje mógu źiśi te ptaški tek derje wobglědowaś, tam jo góla dokoławokoło.