Z Města/Cottbus. Njeźelu, 14. januara, stej wjadłej kuratorka Christina Kliemowa a dr. Annett Brězanowa (wjednica Serbskego kulturnego archiwa w Budyšynje) we ekskluziwnem wjeźenju pó aktualnej wósebnej wustajeńcy w Serbskem muzeju „Darjona wěda – derbstwo Bogumiła Šwjele“. 25 zajmcow jo pśichwatało, aby wužywało tu wósebnu góźbu, až jim dr. Annett Brězanowa, wudawaŕka dnjownikow fararja Bogumiła Šwjele, ku tej tak a tak wjelgin zajmnej wustajeńcy hyšći dodatnu detailowu wědu pósrědnijo. To grono jo mjazy drugim było wót zapalonosći Šwjele za serbske pólinowe mjenja, ale na pśikład teke wót togo, až jomu jo stawnje póbrachowała papjera, abo kake nastajenje jo wón měł k swójomu źěłoju ako faraŕ a ako aktiwist za serbsku rěc. Pśi comž jo se wopokazała jogo angažowanosć za serbsku rěc ako wjeliku zasłužbu za serbski lud, rownocasnje pak ako póśěženje jogo familijnego žywjenja. Wón jo wjele źěłał a drje mało casa doma pśebywał.