Ze Prjawoza/Fehrow. Chtož bydli we toś tej serbskej jsy w bórkojskem amśe, tomu se wěsće njewóstuźijo. Nawěrno! Slědne lěto su tam jadnab 25 wětšych kulturnych, sportowych a wětšych swěźenjow a zgromadnych zarědowanjow wugótowali. To groni, kuždy mjasec narowno dwě! A na nich jo se tych 321 małych a wjelikich wobydlaŕkow a wobydlarjow we radnej licbje wobźěliło. Lisćina jo dłujka a pisana: 12. woklapnica, 140. zapust, camprowanje źiśi, turněr w romeju, jatšowny wogeń, sportowy a familijowy swěźeń, kokot w źiśowni „Małe Myški“, turněr we volleybalu, wustupy wejsnego źiwadła (samo wósym raz!), swěźeń k šlachtowanju, adwentski swěźeń w cerkwi, kórtowanje wó myta a tak dalej a tak dalej!

To wšykno su z wjelikimi pisanymi fotami dožywili hyšći raz te prjawoske slědny tyźeń pětk na swójej 13. woklapnicy. Wěcej ako 50 wobydlaŕkow a wobydlarjow běšo se k wažnej a woblubowanej wejsnej zgromaźinje na zachopjeńku nowego lěta pśinamakało w športaŕskem domje. A dwě z nich – Katja a Beata – stej jim te fota „na sćěnje“ pokazałej a k tomu teke to a druge wulicowałej. Wjeliku chwalbu stej za to dostałej.