Z Kózlego/Casel. Na nowem městnje, z wěcej wobźělnikami ako łoni, jo se wótměła 13. januara kózlańska woklapnica. Góspodowanje jo pśewzeło ten łoni wótwórjony gósćeńc „Blockhaus“ w „Camp Casel“. Nowosć jo teke była, až stej gmejnskej źěla Njamorojce (Illmersdorf) a Chórice (Göritz) samej rozpšawiłej. Tak jo powědał Holger Kretsch-mar wót njamorojskeje wobydlaŕskeje iniciatiwy „Ně k solarnemu parkoju Njamorojce na rolnikaŕski wužywanych pśestrěnjach“ wó jich łońskich aktiwitach a wó planowanej pšosbje, až se bagno„Rohrteich-wiese“ pśez zwignjenje wódnych stawow renaturěrujo. Wjelika tema jo w Njamorojcach nadalej špatne pśidostaśe (Empfang) mobilneje telefonije a wutwaŕ głažaneje seśi, kenž njepśiźo doprědka. Chórice jo z jadnasćo wobydlarjami nejmjeńšy źěl Kózlego, ale ten, kenž w lěśu, w casu festiwala „Wilde Möhre“, tysace gósći pógóspodujo. Kak to dajo se zmejstrowaś, wó tom se wuměnjaju z wugótowarjom – to jo rozpšawiła Jana Kranholdowa. Dalšna wažna tema su felujuce tofle do a ze sedlišća.