Z Města/Cottbus. Sto tysace luźi su zachadny kóńc tyźenja pó cełej Nimskej pśeśiwo pšawicarjam demonstrěrowali. W Grodku su byli to hunderty a w Chóśebuzu jo jadnab 3.500 luźi na naměstno pśed Měsćańskeju halu pśichwatało, aby pód motom „Zgromaźe pśeśiwo pšawicnym – My smy wognjowa mura“ pśeśiwo pšawicarjam a rasizmoju a za demokratiju, tolerancu, lichotu a wótwórjonosć za swět demonstrěrowało. Organizěrował demonstraciju jo zwězk „Unteilbar“, kenž se zasajźijo za tolerancu a towarišnostnu wjelerakosć. Na tej zgromaźinje jo Maja Wallsteinowa (SPD), cłonk Zwězkowego sejma, na 75. jubilej zakładneje kaznje Nimskeje pokazał, a jo pódšmarnuła, až njejo to „pódpěrowańska demonstracija za amplu, ale za demokratiju“. Bramborski ministaŕski prezident Dietmar Woidke (SPD) jo warnował pśed slědami ekstremizma a jo chwalił: „Łužyca se zwignjo za demokratiju!“