Pśed 155 lětami, ga 14. januara 1869, jo se w Cazowje (Zahsow) naroźiła Liza Domaškojc. Wóna jo ze swójeju młodšeju sotšu Marjanu (1872–1946) derje wobzwarnowana wótrosła. Wobej stej chójźiłej do ludoweje šule a stej wót 14. žywjeńskego lěta w chóśebuskej tekstilnej fabrice źěłałej. To stej cyniłej Liza 33 lět dłujko, Marjana 44 lět dłujko. Gaž stej se pó śěžkem źěle domoj wrośiłej (na zachopjeńku stej samo 12 góźin na dnju źěłałej!), stej musałej hyšći na małem pólu a w domje źěłaś. Ako jo jeje maś 1922 wumrěła, jo Liza doma wóstała a domacnosć, gumno a pólo na starosći měła, mjaztym až Marjana jo dalej do fabriki šła. Wobej sotšy njejstej se nigdy wóženiłej a w nejlěpšem póměrje ku se wóstałej. Tej Serbowce stej kśesćijańskej byłej a tradicije woplěwałej, pśecej – teke we fabrice – serbskej chójźiłej. Typiske jadnore žywjenje wejsańskeje ludnosći stej wjadłej, ale pśi tom z wócuśetym zajmom tšojenja a njespšawnosći swójogo casa wobglědałej.