Z Bórkow/Burg. Dnja 7. januara jo była woklapnica Bórkowarjow, a to w Landhotelu, źož jo šołta Bórkow Hans-Jürgen Dreger něźi 150 wobydlarjow a wobydlaŕkow póstrowił, ga teke dalšnych cłonkow głownego wuběrka a amtskego direktora Tobiasa Hentšela. W rozpšawje šołty wó aktiwitach slědnego lěta se wě njejo felowało chwalenje 130. jubilejnego zapusta, kenž su z wušej 140 pórami swěśili. Teke 100lětny jubilej dobrowólneje wognjoweje wobory Kupaŕskich Bórkow a Błośańska powěsćowa noc (tenraz pak góspodaŕski mjenjej wuspěšna) stej byłej mjazy łońskimi wjeraškami. William Janhoefer jo łoni pśewzeł amt zagronitego za serbske nastupnosći we bórkojskem amśe. A wót togo šulskego lěta ma zakładna a wuša šula Mina Witkojc nowego wjednika. Pjerwjejša wjednica jo se pó pšawicaŕskich tšojenjach na tej šuli pśesajźiś dała, jej naslědował jo Markus Mandel. Dalej jo Hans-Jürgen Dreger pokazał na brošuru wó Bórkowaŕce Annemarie Schulzowej a jeje domje, kótaraž jo łoni wujšła. Nowe škrickowańske sćažory su teke tema byli. „Luźe su je kśěli, pak nic pśed swójskimi źurjami...